Sarahs etrap häkimliginiň mejlisler jaýynda geçirilen wagyz-nesihat maslahaty etrap prokuraturasynyň we Türkmenistanyň Magtymguly adyndaky Ýaşlar guramasynyň etrap Geňeşi tarapyndan guraldy. Oňa dürli pudaklarda, guramalarda zähmet çekýän ýaşlar gatnaşdy.

Arkadag Serdarly bagtyýar ýaşlar ýylyna bagyşlanan maslahatda ýurdumyzda ýaşlar syýasatynyň rowaçlanylyşy, bu ugurdaky milli kanunçylygyň kämilleşdirilişi dogrusyndaky gürrüň maslahatdaky çykyşlaryň özenini düzdi. Çykyş edenler bu gün ýurdumyzda milli ýaşlar syýasatynyň üstünlikli durmuşa geçirilýändigini, ýaş nesilleriň döwrebap bilim almagy, döredijilikli işi, mähriban Watanymyza wepaly gulluk etmegi üçin ägirt uly mümkinçilikleriň döredilýändigini, ýaşlar hakdaky hemmetaraplaýyn aladanyň olary täze belentlikleri eýelemäge ruhlandyrýandygyny buýsanç bilen belläp geçdiler.

Maslahatyň barşynda «Ýaşlar barada döwlet syýasaty hakynda» Türkmenistanyň Kanunynyň rejelenen görnüşiniň kabul edilmegi, Türkmenistanyň Magtymguly adyndaky Ýaşlar guramasynyň VIII gurultaýynyň üstünlikli geçirilmegi bilen bagly gürrüňe hem ähmiýet berildi. Oňa gatnaşyjylar Berkarar döwletiň täze eýýamynyň Galkynyşy döwründe ýaşlar hakda edýän bimöçber aladalary üçin Gahryman Arkadagymyzyň we Arkadagly Serdarymyzyň adyna çäksiz alkyşlaryny aýtdylar.