Ýurdumyzda sporty ösdürmeklige, sagdyn durmuş ýörelgelerini köpçülikleýin alyp barmaklyga gönükdirilen maksatnamalaýyn işler yzygiderli durmuşa geçirilýär. Şonuň netijesinde sport hem-de bedenterbiýe bilen meşgullanýan adamlaryň sany barha artýar. 

Eziz Diýarymyzda sportuň dürli görnüşleri boýunça geçirilýän sebit we halkara ýaryşlary dünýäniň nazaryny özüne çekýär. 2024-nji ýylyň 1-nji  aprelinden ýurdumyzyň ýokary okuw mekdepleriniň talyplarynyň we umumybilim berýän orta mekdepleriniň okuwçylarynyň arasynda sportuň täze fijital görnüşleri (physical+digital) boýunça ilkinji gezek geçirilýän ýaryşlaryň badalga almagy hem ýaşlarda sagdyn endikleriň kemala gelmegini gazanmakdan baratdyr. «Hereketli we sanly sport – sportda innowasiýalar» ady bilen geçirilýän bu ýaryşlar 6-njy aprele çenli dowam eder.

Fijital sport (hereketli-sanly sport) – sportuň toplumlaýyn görnüşine degişli bolup, ýaryşýan türgen ýekelikde ýa-da toparlaýyn sportuň belli bir görnüşi boýunça hem hereketli, hem sanly wirtual dünýäde garşydaşy bilen bäsleşmeli. Ol «physical» we «digital» diýen iňlis sözleriniň goşulmagyndan dörän «hereketli-sanly sport» diýen manyny berýär.

Bu özboluşly sport beden taýýarlygyny talap edýän hereketli, adaty sport oýny bilen kibersportuň, ylmyň we tehnologiýanyň utgaşmagyndan dörän täze bir sport görnüşidir.

Serdar GOÇGULYÝEW,
Türkmenistanyň Döwlet energetika
institutynyň talyby.