Galla oragy möwsümi oba hojalygynda jogapkärli döwür. Daýhan yhlasy bilen ýetişdirilen bol hasyly ýitgisiz ýygnamak, möwsümde tehnikalary bökdençsiz işletmek we onuň hyzmatyndan netijeli peýdalanmak bolsa esasy talaplaryň biri.  Bu işde mehanizatorlaryň her biriniň özüniň şahsy jogapkärçiligini duýmagy wajypdyr.

Galla möwsümine taýýarlykly barmak üçin Kaka etrabynda hem talabalaýyk işler alnyp barylýar. Ýakynda bu jogapkärli möwsüme taýýarlyk işleriniň çäginde ýygyma gatnaşjak mehanizatorlar bilen tehniki howpsuzlygynyň düzgünleri boýunça Kaka Awtoulaglar kärhanasynda wagyz-nesihat duşuşygy geçirildi. Duşuşykda etrabyň kärdeşler arkalaşyklarynyň etrap birleşmesiniň wekilleri Galla oragynda mehanizatorlara möwsümde degişli düzgünleri berjaý etmek bilen bagly gymmatly maslahatlaryny berdiler.

Etrapda möwsümde işlediljek tehnikalaryň degişli serişdeler, şol sanda ýangyn söndürijiler bilen üpjünçiligi we olary ulanmagyň düzgünleri boýunça hem düşündiriş işleriniň geçirilýändigini bellemek gerek.

Ogulgerek TÖLEWOWA,

Kaka Awtoulaglar kärhanasynyň
Kärdeşler arkalaşyklarynyň 
ilkinji guramasynyň başlygy.