S. A. Nyýazow adyndaky Türkmen oba hojalyk uniwersitetinde “Suhangöýlük, dilewarlyk, söz sungaty” atly açyk sapak geçirildi. Bu çäre ýaşlaryň söz medeniýetini ösdürmek, olaryň döredijilik ukyplaryny goldamak hem-de edebiýata bolan gyzyklanmasyny artdyrmak maksady bilen guraldy.

Duşuşygyň myhmany hökmünde şahyr, terjimeçi, režissýor hem-de dramaturg Oguljennet Bäşimowa çykyş etdi. Ol talyplar bilen duşuşykda söz sungatynyň jemgyýetdäki ähmiýeti, suhangöýlügiň aýratynlyklary hem-de dilewarlyk ukybynyň adam durmuşyndaky orny barada giňişleýin gürrüň berdi. Şeýle-de ol öz döredijilik tejribesi bilen paýlaşyp, ýaşlaryň döredijilik ýolunda yhlasly zähmet çekmeginiň möhümdigini nygtady.

Açyk sapagyň dowamynda myhman talyplaryň sowallaryna jogap berip, poeziýa, dramaturgiýa hem-de terjimeçilik işi barada gymmatly maslahatlaryny berdi. Talyplar bolsa söz sungaty bilen bagly pikirlerini paýlaşyp, dürli döredijilik çykyşlaryny ýerine ýetirdiler. Bu bolsa çäräniň has-da täsirli hem gyzykly geçmegine mümkinçilik berdi.

Çäräni Türkmenistanyň Bilim ministrligi, S.A Nyýazow adyndaky Türkmen oba hojalyk uniwersiteti, TSTP-niň Aşgabat şäher komitetiniň ýanynda “Ýaş telekeçiler” merkezi hem-de TMÝG-niň Maglumat, maslahat beriş we meýletinçilik hereketiniň işleri boýunça Merkezi bilelikde guradylar.