2025-nji ýylyň 1–10-njy oktýabr aralygynda Birleşen Arap Emirlikleriniň Şarja şäherinde Türkmen–Emirlik işewürler forumy guralar. Çäräni Türkmenistanyň Söwda-senagat edarasy, Şarjanyň Söwda-senagat edarasy we BAE-niň Söwda-senagat edaralarynyň Federasiýasy bilelikde guraýarlar. Bu barada TSSE habar berýär.

Forum häzirki zaman söwda we senagat ugurlaryndaky täze tejribeleri ara alyp maslahatlaşmak, sebitdäki hyzmatdaşlygy giňeltmek hem-de täze hyzmatdaşlary tapmak üçin giň mümkinçilikleri açýar.

Maksatnamada öňdebaryjy hünärmenleriň gatnaşmagynda panel çykyşlary, üstünlikli taslamalaryň tanyşdyrylyşy, şeýle hem eksport hem-de maýa goýum mümkinçiliklerine degişli ýörite sessiýalar bar.

Innowasiýalaryň halkara söwda we senagat ulgamyna täsiri, şeýle-de durnukly ösüş meseleleri esasy üns merkezinde bolar. Guramaçylar forumyň gatnaşýan taraplara Ýakyn Gündogar bazarynda ornuny berkitmäge we täze hyzmatdaşlyk ugruny açmaga ýardam etjekdigini nygtaýarlar.

Geçen gezekki «Türkmenistan – BAE» işewürlik forumy 2024-nji ýylyň 25-nji iýunynda Aşgabatda geçirilipdi.

Seýitmuhammet Orazmämmedow,

Türkmenistanyň Daşary işler ministrliginiň
Halkara gatnaşyklary institutynyň talyby.