Milli medeni däpleriň müdimiligi we dowamatlylygy, olaryň dünýäniň beýleki halklarynyň medeniýeti bilen sazlaşygy Berkarar döwletiň täze eýýamynyň Galkynyşy döwrüniň badyna bat goşýar. Döwletimiziň ählumumy oňyn özgertmeleriň amala aşyrylýan ýurdy hökmünde halkara giňişlikde ykrar edilmegi medeni diplomatiýanyň hem özenini düzýär. BMG we beýleki abraýly halkara guramalar hem-de gaznalar bilen netijeli gatnaşyklary ösdürmek ýurdumyzyň halkara medeni-ynsanperwer ulgamyndaky hyzmatdaşlyk syýasatynyň ileri tutulýan ugurlarynyň biridir. Bu babatda BMG-niň ýöriteleşen edarasy bolan ÝUNESKO bilen hyzmatdaşlyga hem aýratyn orun degişlidir. Bu abraýly gurama medeniýet, ylym we bilim ulgamlarynda ählumumy meseleleriň çözülmegine mümkinçilik berýär. Taryhy-medeni ýadygärlikleri gorap saklamak boýunça taslamalar ýurdumyzda üstünlikli amala aşyrylýar. Umumadamzat gymmatlygy bolan ýadygärlikler hökmünde Gadymy Merwiň, Köneürgenç hem-de Nusaý galalarynyň ÝUNESKO-nyň Bütindünýä mirasynyň sanawyna girizilmegi munuň aýdyň subutnamasydyr. Häzirki wagtda türkmen taryhynyň geçen eýýamlarynyň täsin desgalarynyň we tebigatyň ajaýyp künjekleriniň ýene-de birnäçesi bu abraýly sanawa girizmäge taýýarlanylýar. Şeýle-de ÝUNESKO-nyň Adamzadyň maddy däl medeni mirasynyň sanawyna «Görogly» dessançylyk sungaty, «Küştdepdi aýdym we tans dessury», «Türkmen milli halyçylyk sungaty», «Dutar ýasamak senetçiligi, dutarda saz çalmak we bagşyçylyk sungaty» hem-de «Türkmen keşdeçilik sungaty» ýaly türkmenleriň döredijilik zehininiň gazananlary bu görnükli sanawda orun orun aldy.

Ýurdumyzyň milli gymmatlyklarynyň ýene-de birnäçesiniň hasabyna bu sanawy giňeltmek boýunça alnyp barylýan işler dowam edýär, şol sanda ahalteke atçylygy, alabaý tohum itlerini ösdürip ýetişdirmek bilen baglanyşykly işler hem ýola goýulýar. Berkarar döwletiň täze eýýamynyň Galkynyşy döwründe şeýle möhüm wezipeleriň çözülmegi ýurdumyzda türkmen jemgyýetiniň ägirt uly ruhy we döredijilik kuwwatyny has-da artdyrmak boýunça alnyp barylýan giň gerimli işlere badalga bermäge ýardam edýär. 

Täçmyrat GUWANJOW,

Türkmen oba hojalyk institutynyň talyby.