Ýaponiýanyň Osaka şäherinde geçirilen «EKSPO-2025» Bütindünýä sergisiniň ýapylyş dabarasy ýokary derejede geçirildi. Bu çärä Ýaponiýanyň Imperator maşgalasy, hökümet agzalary, ýerli häkimiýet wekilleri, dürli ýurtlaryň resmi wekiliýetleri, milli pawilýonlaryň wekilleri we diplomatik wekilhanalaryň ýolbaşçylary gatnaşdy.

Türkmenistanyň adyndan bu dabara Söwda we daşary ykdysady aragatnaşyklar ministri N.Agahanowyň ýolbaşçylygyndaky wekiliýet gatnaşdy.

Dabaranyň dowamynda Ýaponiýanyň ýokary derejeli ýolbaşçylary — ministrler, sergi assosiasiýasynyň ýolbaşçylary, ýerli häkimler — çykyş edip, serginiň üstünlikli geçendigini we Osakanyň halkara derejesindäki abraýynyň ýokarlandygyny bellediler. Şeýle-de dabarada onuň Alyhezreti, mirasdüşer şazada Akişino we Ýaponiýanyň Premýer ministri S.Işiba çykyş etdiler.

Wideo görkezmeler bilen serginiň dowamynda bolan wakalar ýatlanyldy, medeni çykyşlar bilen baýlaşdyrylan çärede halkara hyzmatdaşlygynyň ähmiýeti aýratyn bellenildi.

Çäräniň ahyrynda serginiň resmi baýdagy düşürilip, ol indiki «EKSPO-2030» sergisini geçirmegi meýilleşdirýän Saud Arabystanyna resmi taýdan tabşyryldy.

Kadyr GURDOW,

Türkmenistanyň Döwlet energetika
institutynyň mugallymy.