Şu ýylyň 20-nji iýulynda Gruziýanyň Mejlisi Gruziýa bilen Türkmenistanyň Hökümetleriniň arasynda göni uçuşlaryň başlamagyna mümkinçilik berýän «Howa aragatnaşygy barada» şertnamany tassyklady. Häzirki wagtda tassyklanan şertnama güýje girdi.​ Resminama laýyklykda, Gruziýa we Türkmenistan birek-biregiň howa giňişliginde uçuşlary amala aşyrmak, şeýle hem gonuşlary, şol sanda ýolagçy we ýük gatnawlaryny amala aşyrmaga mümkinçilik alar.

Iki ýurduň awiakompaniýalary şertnama baglaşylan ýurtlarda ofislerini açmak we petek satmak hukugyna eýe bolar. Täze ugurlar boýunça uçar gatnawlaryny ýola goýmak üçin kompaniýalar uçuşlaryň ýygylygyny, uçaryň görnüşini we meýilnamanyň dowamlylygyny görkezýän maglumatlary tabşyrmalydyrlar.