Türkmenistanyň Ýaponiýadaky Ilçihanasy we Ýaponiýanyň «Çagalar daşary ýurtlar bilen tanyşýarlar» maksatnamasy tarapyndan Tokio şäherinde mekdep okuwçylary üçin Türkmenistany tanyşdyrýan medeni çäre guraldy.

Bu çärede ýurdumyzyň taryhy, geografiýasy we medeniýeti barada sapaklar geçirilip, türkmen milli aýdym-sazlary we tanslary ýerine ýetirildi. Şeýle hem, Magtymguly Pyragynyň ömri we döredijiligi barada gürrüň berildi. Mundan başga-da, Türkmenistanyň milli mirasyny tanyşdyrýan sergi gurnaldy.

Çärä Tokionyň Akaşi orta mekdebiniň başlangyç synp okuwçylary we olaryň ene-atalary gatnaşdylar. Şeýle medeni çäreler iki ýurduň arasyndaky dostlukly gatnaşyklary pugtalandyrmaga hem-de türkmen medeniýetini dünýäde wagyz etmäge uly goşant goşýar.