Ýurdumyzda oba hojalygy pudagynda ylmy işleri we innowasion çözgütleri giňden wagyz etmek maksady bilen «Türkmenistanda agroinnowasiýa» atly täze ylmy-amaly elektron žurnaly döretmek göz öňünde tutulýar.

Elektron žurnal oba hojalyk pudagynda gazanylan öňdebaryjy tejribeleri, ylmy barlaglaryň netijelerini we häzirki zaman tehnologiýalaryny okyjylara ýetirmegi maksat edinýär.

Täze neşirde agronomiýa, agroekologiýa, gidromeliorasiýa, sanly oba hojalygy hem-de agrosenagat toplumynda ulanylýan ýokary tehnologiýalar bilen baglanyşykly ylmy makalalar çap ediler.

Žurnal türkmen, iňlis we rus dillerinde elektron görnüşde neşir edilip, ýurdumyzyň we daşary ýurtlaryň professorlaryna, alymlaryna, mugallymlaryna hem-de talyplaryna öz ylmy işlerini çap etdirmek üçin giň mümkinçilik döreder.

Oba hojalygy pudagynda şeýle işleriň durmuşa geçirilmegi alymlaryň pikir alyşmagyna, olaryň teklipleriniň goldanylmagyna ýardam etmek bilen, alynýan hasylyň hem ýokary hilli bolmagyny şertlendirer. Hut şu maksatdan ugur alyp hem bu ugurda dürli görnüşdäki işleri alyp barýan alymlar özleriniň ylmy işlerinden bölekleri, makalalary žurnala çapa bererler.