Häzirki zaman tehnologiýalar eýýamynyň senagat önümçiliginde kompozit materiallar giňden ulanylýar. Kompozitler dürli garyndylaryň goşulmagyndan taýýarlanylyp, olaryň polimerden, metal matrisasyndan, keramikadan ýasalýan görnüşleri giňden ýaýrandyr. Türkmenistanyň Senagatçylar we telekeçiler birleşmesiniň agzasy bolan «Şanly mekan» hojalyk jemgyýeti tarapyndan alnyp barylýan önümçilikde hem, esasan, polimer kompozit materiallaryň bir görnüşi bolan stekloplastikler giňden ulanylýar.

2022-nji ýylda esaslandyrylan hojalyk jemgyýetinde nanotehnologiýalar esasynda taýýarlanylýan we bütin dünýäde giňden ulanylýan stekloplastiklerden gezelenç etmek, balyk tutmak üçin dürli görnüşli çaklaňja gaýyklar, şeýle hem gysga wagtyň dowamynda, has takygy, 2-3 günüň içinde tomus aýlarynda suwa düşülýän suw howuzlary taýýarlanylyp, müşderilere hödürlenilýär. Buýurmalar esasynda iş alyp barýan hojalyk jemgyýetiniň önümlerine bolan isleg barha artýar. Önümçiligiň esasy çig maly daşary döwletlerden getirilýär we stekloplastikler berklik, çüýremezlik häsiýetleri bilen tapawutlanýarlar.