Şu gün paýtagtymyzyň «Maslahat köşgünde» türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň başlyklyk etmeginde Türkmenistanyň Halk Maslahatynyň nobatdaky mejlisi geçirilýär. Bu barada Türkmenistanyň resmi metbugaty habar berýär.

Bu mejlis ýurdumyzyň Garaşsyzlygynyň 34 ýyllyk baýramynyň öňüsyrasynda geçirilýär we onuň gün tertibine halkymyzyň abadan hem-de bagtyýar durmuşyny üpjün etmäge, ýurdumyzyň durmuş-ykdysady ösüşini has-da ilerletmäge gönükdirilen möhüm meseleler girizildi.

Mejlise Ministrler Kabinetiniň Başlygynyň orunbasarlary, Mejlisiň deputatlary, ministrlikleriň we pudaklaýyn dolandyryş edaralarynyň ýolbaşçylary, syýasy partiýalaryň hem-de jemgyýetçilik guramalarynyň wekilleri, köpçülikleýin habar beriş serişdeleriniň ýolbaşçylary, welaýat, etrap we şäher häkimleri, ýerli halk maslahatlarynyň agzalary, hormatly ýaşulular, mähriban eneler we jemgyýetçilik wekilleri gatnaşýarlar.