Şu gün Türkmenistanyň Prezidenti Serdar Berdimuhamedow Şanhaý Hyzmatdaşlyk Guramasyna agza döwletleriň Baştutanlarynyň Geňeşine hormatly myhman hökmünde gatnaşmak maksady bilen, Özbegistanyň Samarkant şäherine geldi.

Ir säher bilen Türkmenistanyň Prezidentiniň uçary Samarkant şäheriniň Halkara howa menzilinde gondy. Bu ýerde Döwlet Baştutanymyzy Özbegistan Respublikasynyň Premýer-ministri Abdulla Aripow we beýleki resmi adamlar, şol sanda türkmen wekiliýetiniň agzalary garşyladylar.

Belläp geçsek, Türkmenistanyň Prezidenti Serdar Berdimuhamedowyň iň ýokary döwlet wezipesinde bu dostlukly ýurda amala aşyrýan ikinji saparydyr.