Türkmenistanyň Prezidenti Serdar Berdimuhamedow ählihalk bag ekmek dabarasyna gatnaşdy

Şu gün ýurdumyzda Türkmenistanyň Prezidenti Serdar Berdimuhamedowyň gatnaşmagynda ýazky bag ekmek dabarasyna badalga berildi. Bu çäre döwlet Baştutanymyzyň Türkmenistanyň Prezidenti wezipesinde ilkinji gatnaşan ählihalk çäresidir.  

Türkmenistanyň Prezidenti ählihalk bag ekmek dabarasynyň badalga beriljek ýerine baryp ilkinji agaç nahalyny oturtmak bilen, asylly işe ak pata berdi. Soňra çärä gatnaşyjylar hem hormatly Prezidentimiziň göreldesine eýerdiler. Bu çärä ýurdumyzyň sebitleriniň ýaşaýjylary hem uly ruhubelentlikde goşuldylar. Meşhur sungat ussatlarynyň çykyşlary çärä gatnaşyjylaryň baýramçylyk ruhuny has-da belende göterdi.

Belläp geçsek, hemişelik Bitaraplygymyzyň şanly 25 ýyllygy bellenilen ýylda 25 million, mukaddes Garaşsyzlygymyzyň 30 ýyllyk ýubileýiniň dabaralandyrylan ýylynda bolsa 30 million düýp agaç nahaly oturdyldy.