2026-njy ýylyň 29-njy maýynda ABŞ-nyň paýtagty Waşington şäherindäki Ak tamda Türkmenistanyň Daşary işler ministri Raşid Meredow bilen ABŞ-nyň Döwlet sekretary Marko Rubionyň arasynda duşuşyk geçirildi.

Duşuşykda türkmen-amerikan gatnaşyklarynyň häzirki ýagdaýy we hyzmatdaşlygyň geljekki ösüş ugurlary barada pikir alşyldy. Taraplar soňky ýyllarda iki ýurduň arasyndaky syýasy-diplomatik gatnaşyklaryň has-da işjeňleşendigini belläp, ýokary derejedäki yzygiderli gepleşikleriň möhüm ähmiýete eýedigini nygtadylar.

Gepleşikleriň dowamynda söwda-ykdysady hyzmatdaşlyk, energetika we ulag-aragatnaşyk ulgamlaryndaky özara gatnaşyklar aýratyn üns merkezinde boldy. Şeýle hem energiýa howpsuzlygyny üpjün etmek, energiýa serişdelerini dünýä bazarlaryna ýetirmegiň ugurlaryny giňeltmek we diwersifikasiýalaşdyrmak meseleleri ara alnyp maslahatlaşyldy.

Mundan başga-da, sebit howpsuzlygy bilen baglanyşykly meseleler, häzirki döwrüň howp-hatarlaryna garşy bilelikde hereket etmek hem-de köptaraplaýyn hyzmatdaşlygyň çäklerinde, aýratyn-da «C5+1» platformasy arkaly alnyp barylýan işleriň geljegi boýunça pikir alyşmalar geçirildi.

Duşuşygyň ahyrynda taraplar iki ýurduň arasyndaky hyzmatdaşlygy mundan beýläk-de ösdürmek üçin uly mümkinçilikleriň bardygyny belläp, özara gyzyklanma döredýän ugurlarda netijeli we konstruktiw dialogy dowam etdirmäge taýýardyklaryny beýan etdiler.