2025-nji ýylyň ilkinji dört aýynda Türkmenistandan üstaşyr daşalan ýükleriň möçberi 2 million tonnadan geçdi. Bu görkeziji geçen ýylyň şol döwri bilen deňeşdirilende 20 göterim köpdür. Bu barada Türkmenistanyň resmi metbugaty habar berýär.

Ulag-logistika ulgamlarynyň kämilleşdirilmegi we serhetdäki gümrük nokatlarynyň döwrebap enjamlaşdyrylmagy şeýle ösüşe ýol açdy. Desgalaryň maddy-enjam üpjünçiligi güýçlendirilip, häzirki zaman maglumat tehnologiýalary ornaşdyryldy.

Awtomobil arkaly amala aşyrylýan üstaşyr geçirmeler 25 göterim, demir ýol arkaly bolsa 6 göterim artdy. Görülýän giň gerimli işler ýükleriň bökdençsiz geçmegini we degişli maglumatlaryň tiz işlenilmegini üpjün edýän amatly şertleriň döredilmegine gönükdirilýär.

Ýurdumyzyň ulag geçelgelerinde alnyp barylýan özgertmeler halkara üstaşyr ýük daşamalarynyň netijeliligini ýokarlandyrmaga ýardam edýär.