Her paslyň öz gözelligi bar. Bahar paslynyň gözelligi has üýtgeşik, täsirli, özüne çekiji. Megerem şonuň üçindir, bu paslyň gözelliginiň waspy-da has belent ýaňlanýar. Owadan sähralara elwan gülleri peşgeş berip, biziň ajaýyp ilimize gelen bahar pasly kalbyňy heýjana getirýär. Şeýda bilbiller türkmen tebigatynyň gözelliginiň waspyny edip saýraýarlar. Giň ýaýlalarymyza bahar paslynyň gelmegi bilen owadan reýhan güller açylýar.

Pasyllaryň soltany bolan ýaz paslynyň türkmen tebigatyna gadam basmagy bilen baglaryň pyntyk ýaryp, maýsalaryň garyş-garyş ösmegi, daş-töweregimiziň ýaşyl dona bürenip, köz ýaly gyrmyzy güllere bezenmegi, şeýda bilbilleriň kah-kah urýan nagmasy kalbyňda heýjanalyk duýgusyny döredýär. Uly bol, kiçi bol, parhy ýok, näçe ýaşdadygyňa garamazdan, tebigatyň bu jadylaýjy keşbi biziň her birimizi özüne bendi edýär. Megerem, bahar-ýazyň maýyl ediji şeýle täsiri döredijilik bilen senetçiligi bir galyba salyp bilen ussat şahyryň joşgunly köňlüne hem ylahy ylhamy bagyş edip, şirinden labyzly şygyrlary ýazdyran bolmaly. Munuň şeýledigi Magtymgulynyň ýazan, döreden, dilden-dile geçip, nesillere miras galan goşgularynda hem öz beýanyny tapýar.

Türkmen ýazynyň ajaýyplygy, onuň röwşen keşbi türkmen edebiýatyna, halk döredijiligine siňip, her ynsanyň kalbynda tebigata bolan söýgini güýçlendirýär, ýürekleri joşdurýar, ene topragyň, ata Watanyň waspyny ýetirmekde göwün ylhamyny artdyrýar. Bu barada Gahryman Arkadagymyz «Türkmen medeniýeti» atly kitabynda: «Halk döredijilik eserleriniň iň gadymy we giň ýaýran görnüşi lälelerdir. Alymlaryň pikiriçe, läleler bahar aýlary türkmen sährasyny gyzyl elwan haly kimin örtýän güläleklere, bägüldir çigildemlere bagyşlanan aýdymlardyr» diýip belleýär. Onda ýaz paslynda döredilen eserleriň ýaşaýşy, gözelligi, janlanyşy mähir-muhabbet, joşgun bilen wasp edýändigi beýan edilýär. 

Jeýhun MUHYÝEW,

Türkmen döwlet binagärlik-gurluşyk
institutynyň talyby.