Daşoguz welaýatynyň Köneürgenç etrabynyň çäginde ýerleşýän «Uly ynam» daýhan hojalygy alyp barýan maldarçylyk işlerinde uly üstünlikleri gazanýar. Çünki bu ýerde tejribeli hünärmenleriň yhlasly zähmeti netijesinde, gara mallaryň we dowarlaryň ençemesine göwnejaý ideg edilýär.

Daýhan hojalygynyň maldarçylyk toplumynda häzirki wagtda simmental tohumly gara mallaryň 200-si saklanylýar. Şweýsariýanyň çäklerinde kemala gelen bu tohuma degişli mallar, esasan, iki ugur boýunça, ýagny et we süýt üçin idedilýär.

Bu ýerde idedilýän gara mallardan aýda 8 tonna süýdüň alynýar. Simmental tohumly gara mallaryň süýdi özboluşly tagamy, ýaglylygy bilen tapawutlanýar. Şoňa görä-de, alnan taýýar süýt degişli we konditer ugurly önümçilik bilen meşgullanýan ýerli telekeçilere şertnamalar esasynda ýerlenilýär.

Maldarçylyk bilen meşgullanylanda hemişe üns merkezinde saklanylmaly bir wajyp mesele bolup, ol hem ot-iým meselesidir. Türkmenistanyň Senagatçylar we telekeçiler birleşmesiniň agzasy «Uly ynam» daýhan hojalygynyň bu babatda ýeterlik tejribä eýedigini ýatlamak mümkindir. Muňa daýhan hojalygynyň işgärleri tarapyndan uzak möhletleýin bölünip berlen 100 gektar ýerde ýorunja, kädi, gant şugundyry, jöwen, mekgejöwen ýaly ösümlikleriň ot-iýmlik hökmünde ösdürilip ýetişdirilmegi aýdyň mysaldyr. Bu ösümlikler mallarda ýokary süýt berijiligi saklamaga, süýdüň ýaglylyk derejesini ýokarlandyrmaga ýardam edýärler. Aýratyn bellemeli zat bolsa, bu ýerde degişli ösümlikleri ösdürip ýetişdirmekde dünýä tejribesinde giňden ýaýran gidroponika usulynyň ulanylýanlygydyr.