Ýapon oýunjak öndüriji kompaniýasy “Tomy” Aýyň ýüzüni öwrenmek üçin öndürilen kiçi robot bilen tanyşdyrdy. Öňümizdäki ýyllarda käbir ýurtlar, esasanam ABŞ, Ýeriň emeli hemrasy bolan Aýy öwrenmek üçin birnäçe kosmos uçuşlaryny amala aşyrar. Bu ýurtlaryň ýene biri bolsa Ýaponiýadyr.

Ýaponiýa şu ýyl Aýyň ýüzüni öwrenmek üçin beýsbol ölçegindäki kiçi roboty Aýa uçurar. Bu kiçijek oýunjak görnüşli robot ýapon kompaniýasy “Tomy”, Ýaponiýanyň kosmos gözleg gullugy “JAXA” we “Sony” ýaly beýleki hyzmatdaşlyk edýän kompaniýalar bilen bilelikde 6 ýyldan gowrak wagtda öndürildi.

Diametri 8 santimetr we agramy 250 gram bolan ýasy togalak görnüşli robot “Sora-Q” diýlip atlandyrylýar. Robotyň iki gapdaly şeýle-de öň we arka tarapy ýörite kameralar bilen üpjün edilen. Bu bilen robot düşüren suratlaryny Ýere ugradyp biler.

Ýaponiýaly hünärmenler robotyň beýle kiçi bolmagyny döräp biljek adatdan daşary ýagdaýlarda ýetip biljek oňaýsyz täsirleri azaltmak we tygşytlylyk ýaly ýagdaýlar bilen düşündirilýärler. Robot şu ýyl synag hökmünde, öňümizdäki iki ýyl bolsa tassyklanan we bellenilen tertipde Aýa uçurylar.

Kakageldi IŞANGULYÝEW, 

Döwletmämmet Azady adyndaky
Türkmen milli dünýä dilleri
institutynyň talyby.