Ýaponiýanyň Saglygy goraýyş ministrligi agyr ýitgä sebäp bolýan we dem alyş ýetmezçiligini şeýle-de inçekesel ýaly keselleri öz içine alýan «Kod 2» kategoriýasyndan «COVID-19»-y aýyrdy.
Täze karara laýyklykda, «COVID-19» kanuny taýdan möwsümleýin dümewiň girýän topary bolan «Kod 5» kesel kategoriýasyna giriziler. Şunuň bilen baglylykda, epidemiýa bilen baglanyşykly synaglar we karantin amallary ýatyryldy.
Mundan başga-da, «COVID-19» bilen baglanyşykly hökmany düzgünler we olary ýerine ýetirmezlik üçin jeza çäreleri hem ýatyryldy.
Öň käbir saglyk edaralarynda bejergi alýan «COVID-19» hassalary, ýurduň keselhanalarynda degişli hyzmatlary almak hukugyna eýe bolup bilerler. Agyz-burun örtügi bolsa ýurtda 13-nji martdan bäri halkyň öz islegine görä galdy.
Ýeri gelende belläp geçsek, Koronawirus ilkinji gezek Hytaýyň merkezi Hubeý welaýatynyň Wuhan şäherinde tapyldy. 2020-nji ýylyň 11-nji martynda Bütindünýä saglygy goraýyş guramasy «COVID-19» diýlip atlandyrylýan wirusy pandemiýa diýip yglan etdi.

Maýa SERDAROWA, 

Türkmen döwlet binagärlik-gurluşyk
institutynyň talyby.