Türkmenistanyň Döwlet ykdysadyýet we dolandyryş institutynyň Ykdysadyýet fakultetiniň Dünýä ykdysadyýeti hünärinde okaýan talyplary üçin Türkmenistanyň Senagatçylar we telekeçiler birleşmesiniň binasynda tejribe duşuşygy geçirildi.

Duşuşykda “Döwletli nesibe” hojalyk jemgyýetiniň direktory, Türkmenistanyň Senagatçylar we telekeçiler partiýasynyň Aşgabat şäher komitetiniň "Ýaş telekeçiler" merkeziniň utgaşdyryjysy Haknazar Haljanow çykyş etdi. Ol ýaşlara sanly tehnologiýalar, önümçilik tejribesi, dünýä ykdysadyýetiniň ösüş ugurlary, ýaşlyk döwründe mümkinçiliklerden peýdalanmak hem-de bilimiň orny baradaky pikirlerini paýlaşdy.

Ýaşlaryň telekeçilik dünýäsine bolan gyzyklanmasyny artdyrmak maksady bilen geçirilen duşuşygyň guramaçylygyna TSTB-nyň Telekeçiler mekdebi hem ýardam etdi.

Bu çäre ýaşlaryň ykdysady taýdan pikirleniş ukybyny ösdürmäge, jemgyýetçilik hem-de işewür ulgam bilen ýakyndan tanyş bolmagyna şert döretdi.