Ata-babalarymyz uzak ýyllaryň dowamynda öz nesillerinde tebigy suw gorlaryna eýeçilik gözi bilen garamak endiklerini kemala getirmäge çalşyp, bu ugurdan möhüm işleri ýola goýupdyrlar. Şeýlelikde, ýurdymyzyň ösümlik we haýwanat dünýäsi, çeşme-çaýlar, noburdyr ýap-salmalar, kärizdir kaklar ygtybarly goralypdyr.

               Suwy tygşytly ulanmak we onuň peýdasy hakynda gymmatly edebi nusgalar döredilipdir. Olar ýaş nesliň kalbynda her damjasy altyna deňelen suwuň gymmatyna düşünmäge ýardam edipdir. Şeýle eserleriň biri orta asyrlara degişli bolan «Ajaýyplyklaryň düri» atly kitapdyr. Pähim-paýhaslary, pentleri, nesihatlary, öwüt-ündewleri özünde jemleýän bu eserde suwuň ähmiýeti dürli rowaýatlaryň üsti bilen beýan edilýär.

              Häzirki döwürde tebigy gorlara aýawly çemeleşmek, ýaşaýşyň çeşmesi bolan suwdan tygşytly peýdalanmak meselesine uly üns berilýär. Munuň özi ýurdumyzyň ykdysadyýetiniň ösmegi, raýatlaryň ýaşaýyş-durmuşynyň ýokarlanmagy üçin uly ähmiýete eýe bolup durýar.