Türkmen halkymyzda ýol çekmek, köpri gurmak sogap iş hasap edilýär. Bu asylly ýörelge Arkadagly Serdarymyzyň taýsyz tagallalary bilen täze röwüşe eýe boldy. Paýtagtymyz Aşgabatda toplumlaýyn esasda amala aşyrylýan şähergurluşyk-binagärlik maksatnamalarynyň çäklerinde bina edilýän desgalaryň ýanaşyk ýerlerini abadanlaşdyrmak, döwrebap ýol-ulag düzümini döretmek, ekologiýa howpsuzlygyny üpjün edýän gür baglyga bürenip oturan seýilgähleri, ýaşyl zolaklary döretmek ýaly netijeli işler üstünlikli durmuşa geçirilýär.

Bagtyýarlyga beslenen döwrümizde ýurdumyzda awtoulag serişdeleriniň sany barha artyp, dünýä ülňülerine laýyk gelýän ýollar we köprüler gurlup, ýurdumyzyň ulag-logistika mümkinçilikleri artýar. Hormatly Prezidentimiziň dost-dogana, goňşa uzaýan, sebitleri birleşdirýän ak ýollary gurdurmak ugrundaky alyp barýan işleri ulaglaryň gatnawyny sazlaşdyrmaga hem-de geçijilik ukybyny artdyrmaga uly ýardam edýär. Ýurdumyzyň awtomobil ýollaryny döwrebaplaşdyrmak işiniň giň gerimde ýaýbaňlanmagy ýolagçylaryň gatnadylmagyny-da, halk hojalygy üçin daşalýan ýükleriň möçberleriniň artdyrylmagyna-da oňyn täsirini ýetirýär. Iň esasy-da, döwrebap ýollaryň gurluşygynda öňdebaryjy tehnologiýalardan peýdalanylýar.

Ýeri gelende belläp geçsek, «Arkadag Serdarly bagtyýar ýaşlar ýylynda» Aşgabat — Türkmenabat ýokary tizlikli awtomobil ýolunyň Tejen — Mary bölegini işe girizmek göz öňünde tutulýar. Bu ugurdaky beýik işler «Döwlet adam üçindir!» diýen baş ýörelgämiziň, halkymyzyň asuda we abadan durmuşynyň aýdyň dabaralanmasydyr. 

Mülkiaman YMAMKASYMOW,

Türkmen döwlet binagärlik-gurluşyk
institutynyň talyby.