Ak bugdaý etrabynyň Gämi obasynyň Medeniýet öýünde geçirilen «Ýylyň zenany» atly bäsleşigiň etrap tapgyryna gatnaşmaga gelen bagtyýar zenanlar, ilki bilen, ol ýerde giň gerim alan milli öwüşginli sergi bilen tanyşdylar. Sünnälenilip ýerine ýetirilen el işleriniň sergisinden göwünleri göterilen zenanlar gezekli-gezegine sahna çykyp, bäsleşigiň şertleri boýunça çykyş etdiler.

Zenanlaryň önümçilige, ýurduň syýasy-jemgyýetçilik durmuşyna işjeň gatnaşmagyna ýardam etmek, olaryň ähli ugurlardaky ornuny we işjeňligini ýokarlandyrmak, zenanlaryň başarnygyny hem-de ukybyny açyp görkezmek maksady bilen geçirilen bäsleşik uly gyzyklanma döretdi. Türkmenistanyň Kärdeşler arkalaşyklarynyň etrap birleşmesiniň hem-de Türkmenistanyň Zenanlar birleşiginiň etrap bölüminiň bilelikde guramagynda bolan bäsleşigiň netijesinde «Ýylyň işewür zenany», «Ýylyň çeper elli zenany», «Ýylyň sungatda işjeň zenany», «Ýylyň mährem zenany», «Ýylyň öňdebaryjy oba zenany», «Ýylyň telekeçi zenany» diýen ugurlar boýunça ýeňijiler kesgitlendi. Ýeňijilere ýörite sowgatlar gowşuryldy.