8-nji dekabrda, Ahal welaýatynyň Ak bugdaý etrabynyň Magtymguly adyndaky geňeşliginiň çäginde 4 gatly, 48 öýli döwrebap ýaşaýyş jaýlarynyň birbada 6-sy dabaraly ýagdaýda açyldy. Bu waka täze taryhy döwrümizde halkymyzyň ýaşaýyş-durmuş şertlerini düýpli özgertmek, raýatlary eşretli durmuşda ýaşatmak ugrundaky tagallalaryň barha rowaçlanýandygynyň dabaralanmasyna öwrüldi.

288 hojalyga niýetlenen ýaşaýyş jaýlarynyň gurluşygyny «Joşgun bina» hususy kärhanasy alyp bardy. Hususy kärhanasynyň gurluşykçy-hünärmenlerine Türkmenistanyň Prezidentiniň adyndan sowgatlar gowşuryldy. Bagtyýar maşgalalaryň birnäçesine täze jaýlardan öýleriň açarlarynyň gowşurylmagy dabaranyň şatlykly pursatlarynyň birine öwrüldi.

Dili senaly ýaşulularyň ýagşy dilegleri bilen täze, döwrebap ýaşaýyş jaýlarynyň toý bagy kesildi we hemmeler täze ýaşaýyş jaýlarynyň amatlyklary bilen tanyşdylar.

Dabaranyň myhmanlary jaý toýlaryny toýlaýan döwletli maşgalalarda myhmançylykda bolup, olary täze öý-ojaklary bilen gutladylar.