Beýik Ýüpek ýolunyň ugry boýunça özüne çekiji demir ýol arkaly syýahatçylyk daşary ýurtly jahankeşdelere Merkezi Aziýa ýurtlarynyň taryhy ýerleri bilen tanyşmaga mümkinçilik berýär. Gazagystandan gelýän teker üstündäki bäş ýyldyzly «myhmanhana» Özbegistanyň, Täjigistanyň, Gyrgyzystanyň we Türkmenistanyň şäherleriniň arasynda hereket edýär.

Şu ýyl Iňlis syýahatçylyk operatory «Golden Eagle luxury Trains» kaşaň otlylar topary tarapyndan guralan syýahatyň çäginde Wengriýa, Braziliýa, Russiýa, Beýik Britaniýa ýaly 30-dan gowrak ýurda gelen syýahatçylar türkmen paýtagtynyň we Mary şäheriniň ajaýyp ýerlerine baryp gördüler.

Syýahatçylar üçin gadymy taryhy, baý medeniýeti, özboluşly däp-dessurlary bolan ajaýyp ýurdy açmaga türkmen syýahatçylyk kompaniýalarynyň biri ýardam etdi. Olar Türkmenbaşynyň ruhy metjidine, Haly muzeýine, Garaşsyzlyk binasyna we başga ýerlere baryp gördüler. Daşary ýurtly myhmanlar üçin syýahatyň iň ýatda galan pursatlary Garagum çölünde ýerleşýän Derweze gaz ojagyna baryp görmekde jemlendi.

Ýeri gelende belläp geçsek, häzirki wagtda Türkmenistanda syýahatçylyk pudagynyň ösdürilmegine aýratyn üns berilýär. Bu ugurda hyzmatdaşlygyň işjeňleşdirilmegi daşary ýurtly hyzmatdaşlar bilen işewür gatnaşyklary ýola goýmaga ýardam edýär. Ine, mart aýynda geçirilen Halkara syýahatçylyk maslahatynda öňdebaryjy türkmen we daşary ýurtly syýahatçylyk operatorlaryň geljegi uly hyzmatdaşlygyny ösdürmäge gönükdirilen birnäçe resminamalara gol çekildi.

Laçyn ÖWEZOWA,

Döwletmämmet Azady adyndaky

Türkmen milli dünýä dilleri

institutynyň talyby.