Takmynan 600 ýyl mundan ozal, Şotlandiýada däp bolan golf oýnamak çäresi häzirki döwürde hem iň meşhur sport görnüşleriniň biridir.

«World Golf Awards» çäresinde golf üçin iň gowy ýerler saýlandy. Bu çärede golfyň watany Şotlandiýa «Dünýäniň iň gowy golf mekany» diýlip yglan edildi.

«World’s Best Golf Course» (Dünýäniň iň gowy golf meýdançasy)  kategoriýasynda 5 baýrak alan Şotlandiýa ilkinji gezek iň gowy golf mekany diýen ady aldy. Bu ady mundan ozal, Portugaliýa eýeläpdi.

Şotlandiýada golf ykdysadyýete takmynan ýylda 1,3 milliard dollar, syýahatçylyk bolsa 339 million dollar girdeji getirýär.

Belläp geçsek, ot bilen örtülen uly meýdanda ýörite top bilen oýnalýan golfyň maksady, topy açyk deşige salmak bolup durýar. Topy deşige girizmek üçin iň az sanly urgy bolmaly. Golf meýdançasynda 9 ýa-da 18 deşik bolýar. Her deşik üýtgeşik aýratynlyk we daşky görnüşe eýedir.

Golfda garşydaşlar biri-biriniň oýnuna päsgel bermeýärler we oýnuň nähili tamamlanjakdygy düýbünden şahsyýetiň islegi bagly däldir. Golf oýnunda sport ussatlygy diýseň möhümdir. Şeýle hem urgy wagtynda meýdan zaýalanan bolsa, zerur düzedişler girizilýär we top yzlary ýok edilýär. 

Gülruh ANNABERDIÝEWA,

S.A.Nyýazow adyndaky 
Türkmen oba hojalyk
uniwersitetiniň talyby.