24-nji noýabrda, «Türkmenaragatnaşyk» agentliginiň edara binasynda Türkmenistanyň Ministrler Kabinetiniň ýanyndaky Ulag we kommunikasiýalar agentliginiň, Kärdeşler arkalaşyklarynyň Milli merkeziniň, Zenanlar birleşiginiň Merkezi Geňeşiniň we «Türkmenaragatnaşyk» agentliginiň bilelikde guramagynda «Sagdyn nesil — sagdyn jemgyýet» atly wagyz-nesihat duşuşygy geçirildi.

Wagyz-nesihat duşuşygynda jemgyýetçilik guramalarynyň işgärleri, harby we hukuk goraýjy edaralaryň wekilleri, edara-kärhanalarda zähmet çekýän zenanlar we eneler çykyş etdiler. Duşuşykda çykyş edenler sagdyn we giň gözýetimli nesli kemala getirmekde alnyp barylýan işlerde zenanlaryň abraýly orny barada durmuşy mysallara salgylanyp gürrüňler edildi.