7-nji awgustda, Awazada geçirilen Birleşen Milletler Guramasynyň Deňeze çykalgasy bolmadyk ösüp barýan ýurtlar boýunça Üçünji Maslahatynyň (LLDC3) çäginde Zenan Liderleriň Forumy üstünlikli geçirildi. Forumyň esasy maksady — 2024-2034-nji ýyllar üçin kabul edilen täze maksatnamanyň durmuşa geçirilmeginde aýallaryň we gyzlaryň ornuny giňeltmek we gender deňligini ösdürmekden ybarat boldy.

Çykyş edenler deňze çykalgasy bolmadyk ösüp barýan ýurtlarda aýallaryň ýagdaýyna degişli möhüm sanlary paýlaşdylar:

• Aýallaryň işçi güýjüne gatnaşmak derejesi 54% bolup, erkeklerde bu görkeziji 70%-e ýetýär.
• Aýallaryň aglabasy resmi däl we howply şertlerde işleýär.
• Aýallaryň diňe 30%-i ýokary orta bilim derejesini tamamlaýar, sanly ulgamda aýallaryň diňe 36%-i internetden peýdalanyp bilýär.

Bu görkezijileriň infrastruktura çäklilikleri, ykdysady mümkinçilikleriň azlygy we jemgyýetçilik stereotipleri ýaly meseleler bilen baglydygyny bellediler.

Forum “Herekete çagyryş” beýanaty bilen tamamlandy. Resmiýetçiler, jemgyýetçilik guramalary, ýaşlar we hususy pudagyň wekilleri gender deňligini we aýallaryň mümkinçiliklerini giňeltmek ösüşiň möhüm binýady hökmünde kabul etdiler. Bu çagyryş üstünlikli durmuşa geçirilmegi üçin aýallaryň işjeň gatnaşygyny üpjün etmäge gönükdirilýär.

Zenan Liderleriň Forumy Awazada geçirilen LLDC3 maslahatynyň iň möhüm tematiki çäreleriniň biri boldy. Ol diňe bir aýallaryň sesini ýokarlandyrmak bilen çäklenmän, eýsem olaryň jemgyýetçilik, ykdysady we syýasy ösüşe goşýan goşandyny täze derejä çykarmak üçin sebitara hyzmatdaşlygyň hem-de halkara hyzmatdaşlygyň ähmiýetini görkezdi.

Şatlyk ANNABERDIÝEW,

Türkmenistanyň Döwlet energetika institutynyň mugallymy.